Rusiyalı ekspertlər: “Moskva Bəyannaməsi nümunəsi olmayan tarixi hadisədir”

“Rusiya Federasiyası və Azərbaycan Respublikası arasında müttəfiqlik qarşılıqlı fəaliyyəti haqqında Bəyannamə” nümunəsi olmayan tarixi hadisədir.

Bunu APA-nın Moskva müxbirinə müsahibəsində rusiyalı tanınmış jurnalist, ictimai xadim Maksim Şevçenko bildirib.

Onun sözlərinə görə, Moskva Bəyannaməsi iki liderin, Prezident İlham Əliyev və Prezident Vladimir Putinin siyasətinin nəticəsidir: “Bu sənəd iki ölkə arasında konsktruktiv münasibətlərin ardıcıl inkişafının nəticəsidir. Düşünürəm ki, Rusiya Prezidenti Vladimir Putinin Qarabağla bağlı mövqeyi və Prezident İlham Əliyevin “Azərbaycan hər zaman Rusiyanın tərəfdaşı olub və olacaq” mövqeyi bu tarixi sənədin imzalanmasına gətirib çıxardı. Putin hər zaman Qarabağın Azərbaycanın tərkib hissəsi olduğunu bəyan edib. Fikrimcə, bu bəyannamə bir çox hallarda təkcə postsovet məkanının inkişafını deyil, ümumilikdə dünyanın gələcəyini müəyyən edir. Dünya qərbyönümlü olmaqdan əl çəkməlidir. Dünyada başqa sivilizasiyalar, başqa mədəniyyətlər var. Biz əlbəttə ki, Qərbə qarşı deyilik. Biz mədəniyyətlərarası dialoqun tərəfdarıyıq. Ancaq güclü dövlətlər öz xalqlarının maraqları mövqeyindən çıxış edə bilirlər, bir-biri ilə razılaşa və özlərini qoruya bilirlər. Ona görə də, bu gün mənim üçün bayramdır. Hesab edirəm ki, Azərbaycanla Rusiya arasında bu cür sıx münasibətlər tarixidir, hansı ki, bu xalqlarımızın uzunmüddətli maraqlarına xidmət edir”.

Rusiyalı jurnalist Moskva Bəyannaməsini Şuşa Bəyannaməsi ilə də müqayisə edib: “Bilirsiniz, Şuşa Bəyannaməsi işğaldan azad olunmuş Qarabağın müharibədən sonra hələ soyumamış fonunda imzalanıb. Düşünürəm ki, hər iki sənəddə ümumi xüsusiyyətlər mövcuddur. Hər iki bəyannamə tərəflərin xalqlarının maraqlarına cavab verir. Əminəm ki, ölkələrimiz arasında əlaqələr bundan sonra da daha möhkəmlənəcək və güclənəcək”.

Rusiyanın “Nasionalnaya Oborona” jurnalının baş redaktoru, tanınmış hərbi ekspert İqor Korotçenko APA-ya bildirib ki, Moskva Bəyannaməsi ilə Rusiya bir daha Azərbaycanın ərazi bütövlüyünün, suverenliyinin toxunulmaz olduğunu təsdiqləmiş olub: “Azərbaycan Prezidentinin Rusiyaya rəsmi səfəri və iki ölkə arasında müttəfiqlik haqqında strateji sənədin imzalanması fövqəladə dərəcədə vacib siyasi hadisədir”.

Onun sözlərinə görə, bu sənəd qarşıdakı on illiklərdə Rusiya ilə Azərbaycan arasındakı münasibətlərin inkişafının gedişatını müəyyən edəcək.

“Beynəlxalq vəziyyətin gərgin olduğu şəraitdə Azərbaycan Prezidenti İlham Əliyevin Moskvaya səfər faktı onu göstərir ki, Azərbaycanın simasında Rusiya strateji tərəfdaş, etibarlı müttəfiq qazanıb. Bu bəyannamə ilə Rusiya bir daha Azərbaycanın ərazi bütövlüyünün, suverenliyinin toxunulmaz olduğunu, Qarabağla bağlı üçtərəfli bəyanatların bütün bəndlərinin tez bir zamanda icra olunmasının vacibliyini təsdiqləmiş oldu. Ümid edirik ki, bu səfər və imzalanan sənəd dövlətlərimizin gələcək inkişafı üçün əsas olacaq”, – rusiyalı hərbi ekspert vurğulayıb.